Ciidamada Booliiska degmada Goldogob ee gobolka Mudug ee maamulka Puntland ayaa gacanta ku dhigay eedeysane lagu magacaabo Faarax Xasan Aadan, kaasoo loo haysto inuu si bareer ah u dilay xaaskiisa, Samsam Maxamed Xaashi, kadib muran qoys oo u dhexeeyay labada lamaane.
War rasmi ah oo kasoo baxay Taliska Booliiska gobolka Mudug ayaa lagu sheegay in falka naxdinta leh uu ka dhacay gudaha magaalada Goldogob, halkaas oo ay deganaayeen eedeysanaha iyo marxuumadda. Ciidamada ammaanka ayaa si degdeg ah uga jawaabay dhacdada, taasoo keentay in ay si dhaqso leh gacanta ugu dhigaan eedeysanaha, ka hor inta uusan isku dayin inuu baxsado ama raadkiisa lumo.
Eedeysanaha Faarax Xasan Aadan ayaa haatan lagu hayaa xabsi ku yaalla saldhigga booliiska degmada Goldogob, waxaana la xaqiijiyay in dhawaan la horgeyn doono maxkamad si loogu qaado tallaabo sharci ah, loogana bilaabo habraaca garsoorka ee la xiriira kiisaska dilalka. Booliiska ayaa tilmaamay in dhammaan caddeymaha iyo markhaatifurka la uruurinayo, si dacwadda loogu wajaho si waafaqsan xeerarka dalka.
Samsam Maxamed Xaashi, oo ahayd hooyo Soomaaliyeed oo dhashay toddobo carruur ah, ayaa la xaqiijiyay in ninkeeda uu si arxan darro ah toogasho ugu dilay kadib khilaaf soo kala dhex galay. Dilka marxuumadda ayaa si weyn u gilgilay bulshada ku dhaqan degmada Goldogob, kuwaasoo si weyn u dareemay murugo iyo argagax ku saabsan sida falkani ku dhacay.
Dhacdadan murugada leh ayaa kusoo beegmaysa iyadoo gobolka Mudug ay maalmihii la soo dhaafay kusoo kordhayeen dilalka qorsheysan, falalka rabshadaha ah iyo dagaal beeleedyada, kuwaas oo si isa soo taraya uga dhaca qeybo badan oo ka mid ah gobolka. Arrintan ayaa si weyn u walaac gelisay shacabka iyo maamulka gobolka, iyadoo ay jirto baahi degdeg ah oo loo qabo adkeynta amniga, ka hortagga rabshadaha qoyska, iyo sare u qaadista wacyigelinta bulshada.
