Wasiirka Gaashaandhigga Soomaaliya, Axmed Macallin Fiqi, ayaa garab-istaag u muujiyay Xildhibaanad Ilhaan Cumar oo ka tirsan Aqalka Kongareeska Mareykanka, lagana soo doorto gobolka Minnesota, kadib hadallo uu madaxweynaha Mareykanka Donald Trump ku dhaliilay.
Wasiirka Fiqi ayaa bartiisa Facebook ku qoray:
“Wixii siyaasadda dalka ay xildhibaanka ka tahay waa arrin aan inoo oolin, balse gabadheena haddii isirkeeda lagu beegsanayo garabkeeda ayaan taagannahay, magaceeda iyo magaca halka ay ka soo jeeddo asal ahaan meel weyn ayay gaarsiisay.”
Intaa waxaa uu ku daray:
“Soomaalidu waa dad fac weyn, taariikh fog leh, meesha ay ku nool yihiin ka muuqda, dunidana ka tilmaaman, intaasna waxa jiri kara kuwo dhibsanaya.”
Xildhibaan Ilhaan Cumar, oo asal ahaan ka soo jeedda Soomaaliya, ayaa muddo xileedkeeda labaad ku jirtay Aqalka Kongareeska, halkaas oo dhowaan ay hadallo is-dhaafsi ah la yeelatay madaxweyne Trump. Trump ayaa iyada ku dhaliilay in aysan awoodin inay fahanto sida dal loo maamulo, isagoo ku tilmaamay Soomaaliya “dal sabool ah oo colaado ragaadiyeen” islamarkaana isku dayaysa inay Maraykanka wax ka barato.
Garab-istaaga Wasiirka Fiqi ayaa astaan u ah taageero bulsho iyo mid qaran oo loo muujinayo Ilhaan Cumar, iyadoo hoosta laga xariiqay in eedeymaha ku saleysan isirka aan la aqbali karin, isla markaana magaca iyo asalkeeda uu matalayo guul iyo sumcad Soomaaliyeed.
