Waxaa maanta si weyn u gilgishay isgoyska muhiimka ah ee KM4 ee magaalada Muqdisho banaanbax ballaaran oo ay dhigeen dhalinyarada ku shaqeysata mootada Fekon-ta, kuwaas oo si cad u muujinayay cabashooyin xooggan oo ka dhan ah tacaddiyo iyo culeysyo ay sheegeen in lagu hayo.
Dhalinyaradan oo tiradoodu aad u badneyd ayaa si buuxda u xiray isgoyska KM4, taasoo sababtay in uu istaago isku socodkii caadiga ahaa ee gaadiidka. Waxaa la arkayay gaadiid badan oo hakad ku yimid iyo dadweyne fara badan oo ku qasbanaa in ay lugeeyaan, iyagoo la yaaban xaaladda taagan.
Ciidamada ammaanka ayaa si degdeg ah u gaaray goobta, iyagoo isku dayaya inay kala eryaan banaanbaxayaasha. Goobjoogayaal ayaa sheegay in ciidamada ay adeegsadeen rasaas iyo awood ciidan, taasoo cabsi gelisay dadka shacabka ah ee marayay halkaas.
Mid ka mid ah dhalinyarada mudaharaadeysay ayaa la hadlay warbaahinta, isagoo sheegay in:
“Waxaan la kulmeynaa dhibaatooyin joogto ah oo kaga imaanaya ciidamada ammaanka. Waxaan nahay dhalinyaro shaqo raadis ah oo aan doonayno inaan si sharci ah u shaqeysanno, balse waxaa nalaga qaadayaa lacago xoog ah, maanta saaxiib naga mid ah waa la dhaawacay.”
Dhalinyarada kale ee ka qeyb galeysay mudaharaadka ayaa iyaguna ku doodaya in si bareer ah loogu diiday in ay si xor ah ugu shaqeystaan wadooyinka Muqdisho, iyagoo xusay in ay haystaan sharciyadooda rasmiga ah oo ay dowladda Federaalka Soomaaliya siisay, taasoo muujineysa inay yihiin darawallo sharciyeysan.
Waxay sidoo kale sheegeen in ay dareemayaan cadaadis gaar ah iyo dhibaatooyin joogto ah oo kaga imaanaya ciidamada, taasoo saameyn ku yeelatay noloshooda iyo shaqadoodaba. Dhalinyaradu waxay si isku mid ah u dalbadeen in culayska saaran laga dul qaado, lagana joojiyo jirdilka, handadaada iyo lacagaha sharci darrada ah ee laga qaado.
Ilaa iyo hadda wax war rasmi ah kama soo bixin dowladda Federaalka Soomaaliya ama laamaha amniga, taasoo sii kordhineysa hubanti la’aanta iyo walaaca laga qabo sida ay xaaladdu u xasilin doonto.
Waxaa laga cabsi qabaa in xiisadda ay sii xoogeyso haddii aan si degdeg ah loo helin xal la taaban karo oo lagu qanci karo dhalinyarada ka cabanaya cadaalad darro, maadaama ay u muuqato in ay ka go’an tahay in ay codkooda gaarsiiyaan dowladda iyo shacabka Soomaaliyeed.
