Ilaalada Kacaanka Islaamiga ah ee Iiraan (IRGC) ayaa si rasmi ah u shaaciyay in ay adeegsadeen gantaallada nooca Fatah—kuwaas oo lagu tilmaamo gantaallo hypersonic—intii lagu guda jiray weerarradii gantaallo ee dhawaan lala beegsaday Israa’iil. Sida ay baahisay wakaaladda wararka Iiraan ee Tasnim, gantaallada Fatah ayaa lagu sifeeyay inay yihiin calaamadda bilowga dhammaadka waxa ay ugu yeereen “khuraafaadka nidaamka difaaca hawada ee Israa’iil,” taasoo fariin u diraysa “isbahaysiga dagaalka u ololeeya ee Tel Aviv,” oo ay ku jiraan Mareykanka.
Sida ay sheegeen saraakiisha ka tirsan Ilaalada Kacaanka, gantaallada Fatah ayaa awood u yeeshay inay si buuxda u dhex galaan nidaamka difaaca cirka ee Israa’iil, taas oo muujinaysa, sida ay hadalka u dhigeen, in Iiraan ay si “buuxda u maamusho hawada Israa’iil” – iyagoo tilmaamay in Israa’iil hadda ay tahay “mid aan lahayn difaac sugan.”
Isla mar ahaantaas, Hoggaamiyaha ruuxiga ah ee Iiraan Ayatollah Ali Khamenei ayaa si adag uga hadlay xaaladda, isagoo qoraallo taxane ah ku daabacay baraha bulshada, gaar ahaan barta X. Khamenei wuxuu si cad u sheegay in Iiraan aysan marnaba u tanaasuli doonin Sahyuuniyiinta, wuxuuna ku hanjabay in aan wax naxariis ah loo muujin doonin. Qoraal uu ku daabacay bartiisa ayaa si toos ah u sheegay: “Ma tusin doonno Sahyuuniyadda wax naxariis ah.” Qoraal kale oo uu diray ayaa si kooban u sheegay: “Dagaalku wuu bilaabmayaa.”
Hadalladan adag ee Khamenei ayaa imanaya xilli xiisadda gobolka ay cirka isku shareertay, iyadoo ay jirto cabsi laga qabo in dagaallo ballaaran ay ka qarxaan Bariga Dhexe. Sidoo kale, hadalka hoggaamiyaha Iiraan ayaa jawaab u muuqda oo la xiriirta hadal uu horraantii toddobaadkan jeediyay madaxweynihii hore ee Mareykanka Donald Trump, kaasoo sheegay in Mareykanku “garanayo halka uu joogo Khamenei,” balse aanu doonayn in uu ka soo saaro – ugu yaraan waqtigan la joogo.
Dhacdooyinkan ayaa calaamad u ah kororka iska horimaadka istaraatiijiyadeed ee u dhexeeya Iiraan, Israa’iil iyo xulafada labada dhinac, iyada oo weerarrada noocan ah ay sare u qaadayaan walaaca laga qabo in gobolka uu galo marxalad dagaal oo fool xun.
