Waxaa maanta si rasmi ah loo soo gabagabeeyay imtixaanka fasalka 8-aad ee dugsiyada dhexe ee Dowlad Goboleedka Koonfur Galbeed Soomaaliya. Imtixaankan oo ah mid muhiim u ah waxbarashada ardayda ayaa waxaa ka qeybgalay in ka badan 15,000 arday ah oo ku kala sugan gobollada dowlad goboleedka.
Madaxda Wasaaradda Waxbarashada, Hiddaha iyo Tacliinta Sare ee Dowlad Goboleedka Koonfur Galbeed Soomaaliya ayaa sheegtay in imtixaanka uu ku dhacay si nabad ah, iyadoo la sameeyay dadaallo adag oo lagu xaqiijinayo in aysan dhicin wax dhibaato ah, ciidamo badan ayaa la geeyey xarumaha imtixaanka si loo sugo amniga.
Wasaaradda Waxbarashada ayaa ballanqaaday in natiijooyinka imtixaanka si hufan loo shaacin doono, islamarkaana laga shaqeyn doono horumarinta heerarka kale ee waxbarasho. Tani waxay tilmaam u tahay dadaallada joogtada ah ee dowladda goboleedku ku bixinaayo tayaynta waxbarashada si loo helo jiil aqoonyahan ah oo wax ka beddela mustaqbalka dalka.
