Wakaaladda wararka ee dowladda Iran, Mizan News Agency, ayaa sheegtay in saddex nin oo lagu helay dambi ah inay u basaasayeen Israel la daldalay. Saddexda nin ee la toogtay ayaa lagu kala magacaabaa Ali, Azad Shojai iyo Rasoul Ahmad Rasuul, kuwaas oo lagu eedeeyay inay si qarsoodi ah ula shaqeynayeen hay’adaha sirdoonka Israel.
Warbixinta ayaa intaas ku dartay in raggan lagu qabtay iyadoo ay isku dayayeen inay gudaha dalka Iran soo geliyaan qalab ay u adeegsan lahaayeen “dilal qorsheysan”, iyagoo sidoo kale lagu helay inay la xiriireen Israel si ay u fuliyaan hawlgallo lid ku ah ammaanka gudaha.
Wakaaladda Nour News, oo si dhow ula shaqeysa hay’adaha amniga Iran, ayaa sheegtay in intii uu socday dagaalkii 12-ka maalmood ee dhawaan dhacay, dowladda Iran ay xirtay illaa 700 qof oo lagu tuhunsan yahay inay xiriir la leeyihiin Israel ama u shaqeynayeen danaha sirdoonkeeda.
Xaaladdan ayaa sii xumeyneysa xiriirka qotada dheer ee xun ee u dhaxeeya Iran iyo Israel, iyada oo labada dal ay muddo dheer isku hayaan arrimo la xiriira amaanka, sirdoonka, iyo dagaallada wakiilada ah ee ka socda Bariga Dhexe.
Falkan ayaa sidoo kale kusoo beegmaya xilli xiisadda gobolka ay sare u kacday, iyadoo dhowr weerar iyo falal sirdoon ay is dhaafsadeen Iran iyo Israel, taasoo sare u qaaday walwalka caalamiga ah ee ku aaddan xasilloonida gobolka.
