Milatariga Israa’iil ayaa ku dhawaaqay inay fuliyeen duqayn diyaaradaha aan duuliyaha lahayn (drones) oo lagu beegsaday xarunta laga xukumo ciidamada Suuriya ee magaalada Dimishiq. Sida laga soo xigtay warbixinada rasmiga ah, weerarka ayaa si gaar ah uga dhacay iridda hore ee xarunta milatariga, waxaana uu qayb ka yahay ololaha joogtada ah ee Israa’iil ku wiiqeyso awoodda ciidanka Suuriya.
Tallaabadani waxay timid iyadoo weli socdaan xiisadaha ka taagan koonfurta Suuriya, gaar ahaan gobolka Sweida, halkaas oo bulshada Druze ay isku dhacyo kala duwan la galeen ciidamada dowladda. Wararka ka imanaya gudaha Suuriya ayaa sheegaya in ku dhowaad 250 qof lagu dilay iska horimaadyada labada maalmood ee la soo dhaafay, taas oo sii hurisay xaaladda murugsan ee gobolka.
Afhayeen u hadlay milatariga Israa’iil (IDF) ayaa sheegay in duqayntu ay ahayd tallaabo looga gol lahaa “in la wiiqo awoodda maamulka Suuriya ee kicinaya khilaafyada gudaha” iyo “in la xaqiijiyo difaaca bulshada rayidka ah ee Druze,” oo Israa’iil ku tilmaantay inay wajahayaan khatar ka imanaysa ciidamada dowladda Suuriya.
Weerarkan cusub wuxuu ku soo aadayaa xilli xiisadaha u dhexeeya Israa’iil iyo Suuriya ay sare u sii kacayaan, iyadoo Israa’iil ay dhowr jeer horay uga fulisay weerarro dhanka cirka ah gudaha Suuriya, kuwaas oo inta badan lagu bartilmaameedsado saldhigyada milatariga iyo xarumaha la xiriira Iiraan.
Waxaa weli la sugayaa jawaabta dowladda Suuriya ee ku aaddan duqayntan, hase yeeshee khubaro falanqeeya gobolka ayaa ku tilmaamay ficillada Israa’iil “faragelin milatari oo sii kordhaysa” taas oo laga yaabo inay dhaliso iska horimaad ballaaran mustaqbalka dhow.
