Madaxweynaha Dowlad Goboleedka Koonfur Galbeed Soomaaliya, Mudane Cabdicasiis Xasan Maxamed (Laftagareen), ayaa safar shaqo ku gaaray magaalada Xudur ee xarunta gobolka Bakool, isagoo halkaas u tagay sidii loo dardargelin lahaa dadaallada ku aaddan horumarinta adeegyada bulshada, sugidda amniga, iyo wadatashiyada shacabka ee la xiriira qorsheyaasha horumarineed ee deegaanka.
Madaxweyne Laftagareen oo ay wehliyeen xubno ka tirsan maamulka sare ee Koonfur Galbeed, ayaa si diirran loogu soo dhaweeyay degmada Xudur. Soo dhaweynta ayaa ahayd mid heer sare ah oo ay ka qayb galeen mas’uuliyiin heer gobol iyo degmo, saraakiil ciidan, odayaal dhaqameed, haween, iyo dhalinyaro deegaanka ka soo jeeda.
Intii uu ku sugnaa degmada Xudur, Madaxweynaha ayaa la kulmay qeybaha kala duwan ee bulshada, isagoo dhageystay talooyinka shacabka iyo cabashooyinka ay ka qabaan xaaladaha amni, adeegyada caafimaadka, waxbarashada iyo biyaha. Wuxuu sidoo kale la shiray madaxda ciidamada si loo dardargeliyo qorshayaasha xoreynta deegaannada wali gacanta ugu jira Al-Shabaab iyo adkeynta nabadgalyada guud ee gobolka.
Madaxweynaha ayaa xusay in safarkiisu yahay mid muhiim ah oo qeyb ka ah dadaalka joogtada ah ee lagu doonayo in maamulka Koonfur Galbeed uu si buuxda ugu faa’iideeyo bulshada ku dhaqan gobolka Bakool, isagoo ku celceliyay ballanqaadkiisa ah in la gaarsiiyo adeegyo aasaasi ah dhammaan deegaannada Koonfur Galbeed.
Safarka Madaxweynaha ee Xudur ayaa kusoo beegmaya xilli gobolka Bakool uu ka mid yahay meelaha ugu nugul dhanka amniga, balse muddooyinkii dambe ay ka socdeen howlgallo ka dhan ah Al-Shabaab iyo dadaallo lagu xoojinayo maamulka deegaanka.
