Wararka naga soo gaaraya magaalada New York ee dalka Mareykanka ayaa sheegaya in nin hubeysan uu geystay weerar arxan darro ah oo sababay dhimashada afar qof, oo uu ku jiro sarkaal booliis ah, ka hor intuusan is tooganin. Falkaani ayaa si weyn uga argagaxiyay dadka deegaanka iyo guud ahaan shacabka Mareykanka, iyadoo boolisku ay wali wadaan baaritaanno qoto dheer si ay u helaan sababta keentay weerarkan dhimashada badan sababay.
Weerarkan ayaa dhacay gudaha dhismo dabaq ah oo ku yaalla Park Avenue, meel kamid ah xaafadaha ay dadku ku badan yihiin ee magaalada New York. Sida ay booliisku xaqiijiyeen, ninka weerarka qaaday ayaa gudaha u galay dhismaha isaga oo sito qori fudud (rifle), waxaana uu durbadiiba bilaabay in uu rasaas furo. Qofkii ugu horreeyay ee uu toogtay ayaa ahaa sarkaal booliis ah oo la sheegay in uu isku dayay in uu joojiyo, hase yeeshee uu rasaas ku dhuftay. Intaa ka dib, ninkaasi hubeysan ayaa gudaha dhismaha u sii galay, isagoo fuulay dabaqa 32aad oo uu halkaasna ka sii waday dilalka.
Goob joogayaal ku sugnaa meelaha u dhow ayaa sheegay in ay maqleen dhawaaqa rasaas badan oo isdaba joog ah, taasoo abuuray argagax iyo kala carar. Dad badan ayaa lagu amray in ay guryahooda ku nagaadaan, halka kuwa kale la daadgureeyay si loo badbaadiyo.
Ninka weerarka geystay ayaa lagu magacaabay Shane Tamura, 27 sano jir kasoo jeeda magaalada Las Vegas ee gobolka Nevada. Boolisku waxay sheegeen in uu isagu is toogtay markii uu fuliyay weerarka, islamarkaana uu isagu naftiisa dilay ka hor inta aan la qaban. Wali lama oga sababta dhabta ah ee ku kalliftay Shane Tamura inuu geysto falkaasi, balse saraakiisha baaritaanka hogaaminaya ayaa sheegay in baarayaashu ay eegayaan xiriir kasta oo uu la lahaa dadka uu dilay ama suurtagalnimada inuu la daalaa dhacayay xaalado xagga maskaxda ah.
Mid ka mid ah dadka dhaawacmay ayaa xaalad halis ah ugu jira isbitaalka, waxaana dhaqtarada la tacaalaya ay sheegeen in la geliyay qeybta daryeelka degdegga ah.
Taliska booliiska New York ayaa sheegay in ay kordhin doonaan ammaanka guud ahaan magaalada, gaar ahaan meelaha dadka ay ku badan yihiin iyo dhismayaasha dhaadheer, si looga hortago falal la mid ah. Sidoo kale, waxaa la bilaabay la tashi iyo gargaar nafsi ah oo la siiyo dadkii goobta ka ag dhowaa ama ay saameeyeen dhacdadan.
Falalka noocan oo kale ah ayaa si isa soo taraya ugu soo laabanaya gudaha Mareykanka, iyadoo hadal heyn xooggan ay ka taagan tahay xeerarka hubka ee dalkaasi iyo baahida loo qabo in la xoojiyo sharciyada xakamaynta hubka si loo yareeyo dhimashada ka dhalata toogashooyinka isdaba joogga ah.
Waa dhacdo kale oo muujinaysa halista ay hubka fudud ku hayaan bulshada Mareykanka, iyada oo la filayo in dhacdadan ay kiciso doodo siyaasadeed oo ku saabsan sida loo xakameeyo helista hubka iyo ilaalinta ammaanka dadweynaha. Dowladda hoose ee New York iyo hay’adaha ammaanka ayaa ku baaqay in la iska kaashado sidii loo xoojin lahaa badbaadada dadweynaha, loogana hortagi lahaa falalka naxdinta leh ee sida lama filaanka ah u dhaca.
