Madaxweynaha Mareykanka Donald Trump ayaa sheegay in Mareykanku fuliyay weerar ballaaran oo ka dhan ah Venezuela, isla markaana lagu bartilmaameedsaday Madaxweynaha dalkaas Nicolás Maduro. Hadalkan ayaa Trump ku shaaciyey qoraal uu ku daabacay bartiisa Truth Social, halkaas oo uu ku sheegay in Madaxweyne Maduro iyo xaaskiisa la qabtay, kaddibna diyaarad si gaar ah loogu qaaday dibadda dalka Venezuela.
Trump ayaa qoraalkiisa ku sheegay in hawlgalkan uu ahaa mid si wadajir ah u fuliyeen ciidamada Mareykanka iyo hay’adaha ammaanka ee Mareykanka, isagoo tilmaamay in uu ahaa hawlgal qorsheysan oo muddo la diyaarinayey. Sidoo kale, Trump wuxuu sheegay in Madaxweynihii Venezuela lagu maxkamadeyn doono gudaha Mareykanka, inkasta oo uusan bixin faahfaahin dheeraad ah oo ku saabsan halka rasmiga ah ee lagu hayo, goorta la horgeyn doono maxkamad, ama nooca eedeymaha sharciyeed ee loo jeedin doono.
Sheegashadan uu soo bandhigay Donald Trump ayaa ku soo beegmeysa xilli ay aad u kacsan tahay xiriirka Mareykanka iyo Venezuela, kaddib warar soo baxayay saacadihii iyo maalmaihii u dambeeyay oo tilmaamayay qaraxyo, dhaqdhaqaaqyo militari iyo xaalad amni oo kacsan oo laga soo weriyay caasimadda Caracas iyo deegaano kale oo ka tirsan dalkaas. Xiisaddan ayaa daba socota cunaqabateyn dhaqaale, cadaadis siyaasadeed iyo is eedeymo isdaba-joog ah oo muddo sanado ah u dhexeeyay labada dowladood.
Ilaa iyo hadda, dowladda Venezuela kama aysan hadlin hadalka Trump, mana jirto wax war rasmi ah oo ka soo baxay xafiiska Madaxweyne Nicolás Maduro ama hay’adaha ammaanka ee Venezuela. Sidoo kale, ma jiro wax xaqiijin rasmi ah oo ka yimid Pentagon-ka, Aqalka Cad, Wasaaradda Difaaca Mareykanka ama warbaahinta caalamiga ah oo si madax-bannaan u caddeynaya in hawlgal noocan ah uu dhacay ama in Madaxweyne Maduro la qabtay.
Falanqeeyeyaasha arrimaha siyaasadda iyo ammaanka ayaa tilmaamaya in hadallada Trump ay keeni karaan qalalaase diblomaasiyadeed, isla markaana ay sii hurin karaan xiisadda ka dhex aloosan Mareykanka iyo dalalka taageersan Venezuela. Qaar ka mid ah khubaradu waxay sidoo kale xuseen in sheegashada noocan ah ay u baahan tahay caddeyn rasmi ah, maadaama ay saameyn ku yeelan karto amniga gobolka Latin America, xiriirka caalamiga ah, iyo xasilloonida gudaha Venezuela.
Wararka la xiriira arrintan ayaa weli ah kuwo is khilaafsan, waxaana socda dabagal iyo hubin ku saabsan xaqiiqada hadalkan uu shaaciyay Donald Trump, iyadoo indhaha lagu hayo hadallada ka iman kara dowladda Venezuela, hay’adaha Mareykanka iyo warbaahinta caalamiga ah saacadaha iyo maalmaha soo socda.
