Guddoonka Baarlamaanka Spain ayaa Talaadadii si rasmi ah u guddoomay hindise sharciyeed cusub oo dhigaya in gabi ahaanba la mamnuuco iibinta hubka iyo qalabka militariga ee laga dhoofiyo dalkaasi Spain looguna iib geeyo Israel. Hindisahan ayaa waxaa soo gudbisay dowladda Spain, iyada oo uu yahay mid si weyn loo taageeray marka loo eego xaaladda kasii daraysa ee dagaalka ka socda Marinka Gaza.
Guddoonka Baarlamaanka ayaa isla markiiba shaaciyay inay qorsheynayaan in si degdeg ah loo bilaabo dooddii rasmi ahayd ee xildhibaanada, si loo horgeeyo hindisahan sharciyeed, loogana doodo iyadoo cod loo qaadi doono marka dooddii la dhameeyo. Sida ay sheegayaan warbaahinta gudaha dalka Spain, go’aanka guddoonka wuxuu muujinayaa muhiimadda ay dowladda iyo golaha sharci-dejinta u arkaan tallaabadan.
Arrin xiiso leh ayaa ah in illaa iyo hadda aysan jirin wax mucaaradad ah oo si cad uga hortimid hindisahan. Xisbiyada siyaasadeed ee kala duwan ee dalka Spain ayaa u muuqda kuwo si mideysan u taageeraya go’aanka, taasoo sare u qaadaysa rajada laga qabo in si buuxda loo meel mariyo xeerka.
Haddii hindisaha la ansixiyo, wuxuu noqon doonaa sharci rasmi ah oo dhaqan geli doona, taas oo micnaheedu yahay in dhammaan shirkadaha hubka farsameeya iyo kuwa kale ee soo saara qalabka ciidan ee dalkaasi laga leeyahay laga mamnuuci doono inay heshiis ganacsi la galaan dowladda Israel. Tani waxay noqon doontaa tallaabo aad u weyn oo dhanka cadaadiska siyaasadeed ah, oo la saaro Israel, iyadoo laga jawaabayo dagaalka ba’an ee ay waddo.
Spain waxay horey uga mid ahayd dalalka Midowga Yurub ee si cad u muujiyay in ay doonayaan in cunaqabateyn dhab ah lagu soo rogo Israel, iyada oo lagu cadaadinayo in la joojiyo colaadda Gaza. Wasiirka Arrimaha Dibadda ee dalkaasi, Jose Manuel Albares, ayaa toddobaadkan ku baaqay in la qaado cunaqabateyn hub ah oo heer caalami ah, haddii Israel ay sii waddo dagaalka.
Isagoo ka hadlayay xaalada bini’aadantinimo ee ka sii dareysa Marinka Gaza, Wasiir Albares wuxuu xusay in Spain aysan aamusnaan doonin marka ay aragto dad rayid ah oo lagu waxyeeleynayo dagaallo ba’an, halka Israel ay ka dhega adeegtay baaqyada caalamiga ah ee dalbanaya xabbad joojin.
Beesha caalamka, gaar ahaan Qaramada Midoobay iyo xulafada reer galbeedka ee Israel, ayaa si weyn uga walaacsan xaaladda gargaarka bani’aadantinimo ee Gaza, iyagoo sheegay in carqaladeynta gargaarka ay horseedi karto macluul baahsan. Sidoo kale, waxay si cad u sheegeen in aan la aqbali karin in la xannibo gargaarka lagama maarmaanka u ah badbaadinta nolosha dadka rayidka ah.
Baaqa beesha caalamka ma aha mid ku kooban joojinta dagaalka Gaza oo keliya, balse waxaa sidoo kale lagu dalbanayaa in Israel ay soo afjarto dhismaha deegaamada sharci darrada ah ee ay weli ka waddo Daanta Galbeed. Waxay dalbadeen in la helo xal siyaasadeed oo dhab ah oo ku saleysan laba dal oo deris ah, arrin ay u arkaan inay tahay waddada kaliya ee lagu gaari karo nabad waarta Bariga Dhexe.
Si kastaba ha ahaatee, Raysal Wasaare Benjamin Netanyahu iyo xubnaha xagjirka ah ee xukuumaddiisa ayaa gebi ahaanba kasoo horjeeda in la joojiyo dagaalka, iyagoo ku dooday in hawlgalkoodu weli socdo oo aan Xamaas laga adkaan. Hase yeeshee, waxaa si isdaba joog ah loo eedeynayaa ciidamadooda in ay ku kacayaan falal dambiyeedyo dagaal oo ka dhan ah dadka rayidka ah ee ku sugan Gaza – arrin ay madaxda reer galbeedka si adag u cambaareeyeen.
Haddii baarlamaanka Spain uu ansixiyo xeerkan, wuxuu noqon doonaa tallaabadii ugu xoogga badneyd ee waddan reer Yurub ah ku qaaday cunaqabateynta Israel, iyadoo ay sii xoogeysanayaan codadka caalamiga ah ee dalbanaya in la joojiyo colaadda Gaza oo hadda gashay bilooyin xiriir ah oo dagaal ah.
