Madaxweynaha Mareykanka Donald Trump iyo Ra’iisul Wasaaraha Israa’iil Benjamin Netanyahu ayaa si wadajir ah u sheegay inay ku heshiiyeen qorshe cusub oo nabadeed oo lagu wajahayo xaaladda Qasa, iyagoo uga digay Xamaas in aysan ka bixin talooyinka iyo shuruudaha lagu soo jeediyay qorshahan. Tallaabadani waxay u muuqataa mid lagu doonayo in xal waara loo helo colaadda daba-dheeraatay ee gobolka, taas oo sababsatay khasaare naf iyo maalba leh.
Qorshaha cusub ee ay ku heshiiyeen labada hogaamiye ayaa dhigaya in si degdeg ah loo joojiyo hawlgallada milatari ee socda, iyadoo Xamaas looga baahan yahay in ay sii dayso 20 qof oo Israa’iiliyiin ah oo hadda gacantooda ku jira. Sidoo kale, waxaa lagu daray shuruud ah in haraaga in ka badan labaatan qof oo la haystayaal ah oo la rumeysan yahay inay ku dhinteen gacanta Xamaas lagu soo wareejiyo 72 saacadood gudahood. Bedel ahaan, waxaa la qorsheeyay in boqollaal Falastiiniyiin ah oo ku jira xabsiyada Israa’iil dib xorriyadooda loo siiyo.
Ilo xog ogaal ah oo ka tirsan dhinaca Falastiiniyiinta, isla markaana si dhow ula socda wada xaajoodka xabbad-joojinta, ayaa u sheegay BBC in saraakiisha Xamaas la hor dhigay soo jeedinta Aqalka Cad ee ka kooban ilaa 20 qodob oo faahfaahsan. Qodobadan ayaa si gaar ah diiradda u saaraya sidii loo heli lahaa hannaan cusub oo maamulka Qasa looga dhigo mid ka madax-bannaan saamaynta Xamaas, taas oo albaab u furaysa in mustaqbalka la dhiso dowlad rasmi ah oo ay hoggaamiyaan Falastiiniyiinta.
Qorshahan ayaa noqday mid muran dhalin kara, maadaama uu si cad meesha uga saarayo door kasta oo Xamaas ka yeelan karto maamulka Qasa, iyadoo dhanka kale loo arko fursad diblomaasiyadeed oo lagu yareyn karo xiisadda gobolka, isla markaana loo abuuri karo jawi wadahadal oo ka duwan xaaladaha hore ee murugsanaa.
