Ciidanka Hay’adda Sirdoonka iyo Nabadsugidda Qaranka (NISA) oo kaashanaya saaxiibada caalamiga ah ayaa howlgal qorsheysan oo lagu beegsaday kooxda Al-shabaab ka fuliyay deegaanka Mabaax ee gobolka Hiiraan, kaas oo lagu dilay 18 xubnood oo ka tirsan kooxda ururka.
Sida lagu sheegay war kasoo baxay NISA, howlgalka ayaa qeyb ka ahaa dadaallada joogtada ah ee lagula dagaalamaayo Al-shabaab ee ka socda qaybo badan oo dalka ka mid ah, gaar ahaan deegaannada hoos taga dowlad-goboleedka HirShabeelle. Intii uu socday howlgalka, sidoo kale waxaa la burburiyay labo gaari dagaal ah oo ay Al-shabaab doonayeen inay ku baxsadaan.
Afhayeenka Wasaaradda Gaashaandhigga, Sheekh Abuukar Macallin, ayaa sheegay in hawlgalka uu ku dhamaaday guul buuxda, ayna ciidamada hadda wadaan howlgallo miino baaris ah si loo xaqiijiyo amniga deegaanka. Waxaa intaa uu ku daray in ciidamada aysan gaarin wax khasaare ah, halka khasaarihii Al-shabaab aan wali la xaqiijin.
Howlgalkan ayaa muujinaya sida uu iskaashiga amni ee u dhexeeya Soomaaliya iyo saaxiibada caalamiga ah uu gacan uga geysanayo baabi’inta Al-shabaab iyo nabadeynta guud ahaan dalka. Dowladda Federaalka Soomaaliya ayaa mar kale ku celisay go’aankeeda ah in aysan joojineyn dagaalka Al-shabaab ilaa laga ciribtiro guud ahaan dalka.
